小說角色復仇記（上）
人生，有好多事都係無法預料。
作為一個作家，我最鍾意寫無法預料嘅事，但我估唔到，呢種事會發生喺我身上。
我今日喺屋企寫小說，寫寫吓突然發現，我身後有幾十個形相各異嘅男人，全部都望住我。
我嚇呆咗：「你哋係咩人？你哋點入嚟㗎？」明明我半個鐘前去廁所，屋企都係得我一個。
佢哋七嘴八舌咁答：「我叫祥仔。」「我叫阿輝。」「我叫醜豪。」
我再望多兩眼，我肯定自己唔識佢哋喎，尤其是嗰個醜豪，醜樣到驚天地泣鬼神，假如我見過佢，我一定唔會唔記得。
祥仔繼續講：「我係祥仔啊，為咗買樓，我害死咗我阿嫲同老豆，仲殺埋我女朋友……」
阿輝話：「為咗唔畀禮金，我打瘸咗女朋友隻腳，依加件事穿咗，我坐緊監啦。」
醜豪最激動：「你居然唔記得我？我係地球上最後一個男人，我以為我會溝到女，點知全世界嘅男人都死晒，都冇女人鍾意我啊！」
咪住先，佢哋講嘅經歷咁熟悉，似乎全部都係我寫過嘅故仔。
呢個時候，一隻狗從人群中撲出嚟，一下子將我撳低，露出好似吸血鬼一樣嘅牙齒。
我記得啦，我寫過一個故仔，話旺財俾吸血鬼咬咗，變成一隻吸血狗。
呢班小說角色凶神惡煞咁睥住我，好明顯唔係嚟感激我創造咗佢哋。
我吞吞吐吐咁問：「各位有咩指教？」
「大家寫小說，都係踩配角，畀主角爽。」祥仔忿忿不平：「你呢？你筆下嘅主角一個比一個慘，你有冇諗過我哋嘅感受？」
冇，我真係冇，因為我冇諗過佢哋會變成真人，同真狗㗎嘛。
阿輝緊握拳頭：「唔好同佢講咁多，打佢一鑊先。」
我連忙縮埋一角：「你哋打女人㗎咩？」
「梗係打啦，我仲親手打瘸咗我女朋友隻腳，係你寫㗎。」阿輝答得理所當然。
醜豪攔住阿輝：「暴力解決唔到問題，就算你暴力到令全世界嘅男人死晒，問題都可以冇被解決。」
「講番正題啦，由於你嘅特殊寫作偏好，我哋每一個主角都喺自己嘅世界，過得勁慘。」
祥仔話：「所以，我哋組成『受害主角聯盟』，一齊穿越嚟搵你討回公道。」
好漢不吃眼前虧，我唯唯諾諾咁話：「對唔住咁多位大佬。」
祥仔話：「所以，你就要寫番好我哋嘅結局，令我哋每一個都幸福快樂咁生活落去。」
「例如寫，所有女人都突然愛上我獨特嘅外貌。」醜豪插嘴。
我忍唔住問：「我寫乜嘢，你哋嘅生活就會有咩改變？」
祥仔點點頭：「原有嘅劇情唔可以改，但可以加新劇情，改變我哋嘅未來。」
眼前嘅情況，都唔容許我拒絕，我連忙撲向電腦前：「我依加就開始寫。」
我寫咗兩句，阿輝就大叫：「穿越時間到。」
回頭一望，佢哋嘅身影愈嚟愈淡，消失之前，醜豪大叫一聲：「好好地寫啊，我哋會返嚟搵你㗎。」
經歷咗呢一轉，我點敢唔好好寫呢？
我發誓，我本來係打算幫佢哋每個人，都加個好結局嘅。
但一落筆，我先發現唔係好妥，我原先寫嘅時候，實在係寫得太盡啦，如果要加好結局，邏輯上根本講唔通。
例如祥仔，佢害死咗佢阿嫲同老豆，仲殺咗佢女朋友，好明顯已經癲癲地，而且佢殺人仲有晒證據，咁我點畀好結局佢呢？
打瘸咗女朋友隻腳、已經坐緊監嘅阿輝，唔通我話佢突然逃獄成功？
仲有全世界最醜嘅醜豪，佢希望所有女人都愛上佢……仲要愛埋獨特佢嘅外貌。
寫小說，有時唔可以一蹴而就。
我就坐低慢慢思考，點樣幫佢哋每個人諗一個好結局。
待續...
將專頁設定為「搶先看」/ "See first"，最新故仔馬上睇！
做咗神仙之後：https://goo.gl/L5qRPG
全家都想食我：http://bit.do/fedrQ
#短故 #短篇 #小說 #陳美濤 #廣東話 #粵語 #tomatochan #小說角色復仇記
Search